सांगीतिक श्रद्धांजलीने अत्रे कट्ट्याचा वर्धापन दिन साजरा..
पनवेल /वार्ताहर - : नवीन पनवेल येथील आचार्य अत्रे कट्ट्याने आपला वर्धापन दिन दिग्गज गायकांना सांगीतिक श्रद्धांजली वाहून अनोख्या प्रकारे साजरा केला. सदर कार्यक्रम कर्नाटक संघ हॉल, सेक्टर २ नवीन पनवेल येथे झाला.
कै. रामदास कामत, कै. कीर्ती शिलेदार, कै. राजन मिश्रा व भारतरत्न कै. लतादीदी यांचे गायन मनाला मोहवणारं होतं. या दिग्गज कलावंतांच्या जाण्याने पोकळी तयार झाली असली तरी ख-या अर्थाने रसिकांच्या मनात हे दिग्गज कलाकार कायमचे ठाण मांडून आहेत याची जाणीव सदर कार्यक्रमाने करून दिली. आकाशवाणीच्या कल्याणमधील कलाकारांनी हा सांगीतिक श्रद्धांजलीचा कार्यक्रम सादर केला. मंगेश लटके, प्रतिक फणसे, ज्योती खरे यादवार यांनी गीते सादर केली. त्यांना तबल्यावर स्नेहल धामापूरकर, व्हायोलीन वर रवी सिधये तर संवादिनी वर जयंत फडके यांनी साथ दिली. पूर्वा कर्वे यांनी सूत्रसंचालन केले. या कलाकारांनी सादर केलेल्या संगीत रस सुरस, तिन्हीसांजा सखे निघाल्या, देवा घरचे ज्ञात कुणाला, श्रावणात घननीळा, शतजन्म शोधिताना, यती मन मम, प्रथम तुज पाहता, पावना वामना, कशासाठी येऊ देवा, हसले मनी चांदणे, गुंतता हृदय हे , धन्य भाग सेवाका अवसर पाया अशा एकाहून एक सरस गाण्यांनी रसिक भारावून गेले.
लेखकाने लिहिलेल्या गाण्यांचा मतितार्थ काय आहे, माझा स्वर कसा लागतोय, माझे साथीदार माझ्या बरोबर येत आहेत की नाही या गोष्टींचा विचार करून गाणं सादर केल्यास गायकाचे सादरीकरण प्रभावी होते हे मत मंगेश लटके यांनी व्यक्त केलं. वैशाली केतकर यांनी वर्धापन दिन कार्यक्रमाचे सूत्रसंचालन केले.